شهادة مصطفي الغريب بشأن الشهيد عصام عطا وما حدث في سجن طره (برنامج مانشيت الأحد 24 فبراير 2013)

الاسم: مصطفي الغريب

الموطن: كفر صقر شرقية

قصته الشخصية وعلاقتها بمعلوماته عن عصام عطا

في مارس 2011 يعنى بعد الثورة علي طول جت التحريات العسكرية المحل وقالولي انت …. (اسم آخر) قلت لأ..أنا مصطفي الغريب…سألوا بطاقتك..قلت في البيت قريب من هنا..مش دايما بأشيلها لأننا بلد صغيرة وكل الناس عارفة بعض.. أخدونى معاهم الي س 29 بهدلة وتعذيب واهانة وحط من الكرامة فوق تصور اي انسان بالذات بعد الثورة…كنا لسه بنقول الجيش قام بدور كويس مع الثورة..فالتعذيب بإيد الجيش كان مفاجأة ..صدمة كبيرة.

ضرب وكهرباء وشتيمة بذيئة بدون حتى ما أعرف أنا متتاخد ليه. بعدها حولونى الي س 28 نفس المعاملة ..التشريفة من أول ما تتدخل ..يقلعونا كل هدومنا ونقف بس بالسليب ..وضب في كل حته وشتيمة وكهربا.

من س 28 رحت النيابة العسكرية..قلت الحمد لله حيبان ان في غلط في القبض علي ويطلعونى..ده حتى مفيش اي تشابه مع اسم الراجل اللي كانوا بيسألو عنه.

وأحبطت تانى..في النيابة قاعدين علي قرفيصنا زى أسري الحرب..قلت لوكيل النيابة انا ما عملتش حاجة واتهنت واتعذبت .. كنا مجموعة قصاد النيابة مش واحد واحد..لقيت الحكم سنتين سجن بتهمة انتحال صفة شرطة عسكرية! طب فين الحرز..فين الهدوم العسكرية اللي ظبطونى بيها..مفيش.

رحلونى علي السجن الحربي كام يوم ومنه علي سجن العقرب.. كنا 100 في عربية الترحيلات.. سجن العقرب في بوابتين لدخول الناس واحدة منهم كهربائية..اتحشرنا بين البوابتين وطبعا كانوا قلعونا هدومنا برضة..بدأو يخرجونا خمسة خمسة ..من البوابة للزنازين..وطول المسافة دي عساكر امن مركزى تستلقانا..تشريفة طبعا..ضب بالرجلين بالكف بالعصتية..من الجنبين كله بيضرب.

وصلت السجن يوم الأربعاء ..الضابط قال مالكوش عندي أكل ومفيش فتح للباب..إن جالكو أكل يبقي من حصة باقي المساجين.

يوم السبت جت مصلحة السجون..كان في عنبر عامل اضراب..يطلعوا الناس خمسة خمسة وينزلوا فيهم هرس..وأنا جوه مرعوب..مستنى دورى..الانتظار فظيع وسط صراخ اللي بيتهرسوا برة..أنا مريض بالقلب ومن الرعب جاتلي أزمة قلبية…كان 100 عسكري علي الخمسة اللي بيستلموهم.

كان كل يوم الصبح يجي تفتيش علي الزنزانة..وقبل ما يبدءوا التفتيش يبدأ السب والضرب..طب مش لما تلقوا ممنوعات تبقوا تشتموا..وأصلا مش مفروض لو لقوا ممنوعات يشتموا ولا يضربوا..يعملوا قضية..يزودوا مدة العقوبة..مش ضرب وإهانة وبهدلة كرامة كل يوم علي الصبح. مش بس كده ده الإكل الي بييجي في الزيارة ومتكلف مئات الجنيهات غير التعب.. كله يترمى علي الأرض.

(تدخل من ابنه مصطفي بسمة الغريب) الزيارة كانت بتكلفنا 1000 جنية وندي زيهم رشاوى علشان نحمى نفسنا من البهدلة..مش الأكل بس اللي بيتفتش ده كمان تفتيش شخصي..واحدة ست شكلها غريب تفتش تفتيش ذاتى وتحط ايدها علي مناطق حساسة بطريقة مهينة جدا..حتى أهل المسجون كانوا حريصين يهينوهم ويحوا من كرامتهم. (انتهت المداخلو)

استكمال كلام مصطفي الغريب:  البنت عملت بلاغات للتعذيب فجالي بعدها ظابط وقاللي بلاش كده بدل ما تلبس قضية تانية أو ظابط يعمللك حاجة..لم الدور

بعدها شغلونى ميسر سجن.. يعنى آخد التمام قبل قفل الزنازين وادي الكارت للي رايح الزيارة ولا العيادة ولا التأديب وأسجل في الدفاتر..الخ ودي العلاقة اللي دجمعتنى بعصام عطا وبالمساجين.

كان الناس بياخدو دروس وعظ  علشان يصلوا ..س عصام كان بيصلي أصلا ومؤدب وملتزم.. ومش بيشرب السيجارة..يعنى اللي مش بيشرب سجاير حيشرب مخدرات؟

أنا كنت ماسك الزيارات ..وكان عصام بقاله 3 شهور ما جتلوش زيارة..وسألته قال الحالة برة صعبة..فكنت باطلب من اللي بتجيلهم زيارات يدونى سجاير – هلي عملة السجن – وأدي للي ما بيجيلوش زيارات. تكافل اجتماعي يعنى.

كان في مسجون اسمه محمد حسن في عنبر 4 – زنزانة 14 – حصل بينه وبين عصام مشاجرة..الواد ده كان ماسك الكافيتريا..بيعمل شاي.. وطبعا بيشتغل جاسوس علي المساجين..لما اتخانق مع عصام راح قال للظابط أنا شفت عصام بيآخد حاجة ..

أنا كنت طلعت عصام الزيارة وما رجعش بعدها..حتى لو راح التاديب ازم اديله الكارت اللي عليه صورته وبياناته.. وآخد التمام بتاعي..فرحت أشوف عصام فين لقيته عند الظابط ( نور )..حجرة الزيارة فيها شباك علي حجرة معاون المباحث ..بصيت من الشباك لقيت المخبرين بيضربوا عصام..رجعت علي العنبر بعدها جه عصام والسجن طلب الكارت بتاعه..بس استنيت لما المأمور يثبت في الدفاتر وما سلمتش الكارته..رحت للمأمور وسألته ..حضرتك قلت عصام عطا يروح التاديب ؟ قال لأ.." في السجن في قوتين قوة المأمور وقوة رئيسالمباحث..لو اجتمعوا بتبقي عيشة المساجين سودة..ومن حسن حظ عصام انه ماكانش في توافق بينهم"

لما نور عرف رد المامور اتغاظ..وقال ادوله شربة وحطو الخرطوم في الدبر" كان موجود في الواقعة سيد سمرة…الشربة عبارة عن زيت وملح وتبغ سجاير" الكلام ده أنا سمعته ما شفتوش بنفسي لكن الضرب اللي قبله شفته بعينى" جالي عصام وحكالي اللي حصل ده..كان في حاجات علي وشه ..الكلام ده كان يوم الثلاثاء 25/10/2011 ..فات يوم جه زميله محمد علي قاللي عصام عنده نزيف "من الشرج" فطلبتله الطبية..راح حطوله محاليل ورجع..الساعة 2 تعب تانى قلت له في ايه ..قالي نور عمل في ……. يوم 27 كتبت في دفتر السجن طلب خروجه للعلاج لسوء حالته الصحية..كان بيرغى من بقه..عصام مات قبل ما يسيب السجن..الكلام ده كان الساعة 3 وده ما يتنسيش لأنه وقت التمام.

يوم 28 /10 جت مصلحة السجون..أخدو منى حديث بس رفضوا شهادتى..المصلحة جاية تفرز الشهادات وتشوف تختار مين يقابل النيابة..اللي مع عصام استبعد.

دايما ده بيحصل..لما يكون الظابط ضارب حد يجيب اتنين من اللي عليهم علامات يشهدوا ان المسجون عمل كده في نفسه.

أنا شفت الضرب بنفسي والخرطوم والشربة اتحكالي من مساجين ومن عصام نفسه ..وشفت النزيف الشرجى..والناس اللي في حجرته قالو نفس الكلام..والسجن طلع إشاعة ان عصام اتسمم من الطعمية اللي بيعملها – كان بيعمل طعمية في السجن- بس كلنا أكلنا من الطعمية وأكلنا من زيارته..وماحدش حصل له حاجة.

طب الزيارة يوم 25 وهو مات يوم 28 من ضربه وتعذيبه..طب أ‘مل أشعة..عالجه..ده حتى لو واحد أخد مخدرات فعلا عليك انك تعالجه وبعدين تبقي تعمل له قضية..ولو في مخدرات في السجن برضه مسئوليتك انك مش شايف شغلك كويس.

مثلا أنا عندي القلب ماعملوليش حاجة في السجن.. لا رسم قلب ولا علاج..

المهم الجثة طلعت يوم 27 أكتوبر.. الشيخ سيد شاهد الواقعة.

ما عرفتش بقي بالتطورات اللي بعد ما طلعت بفترة..أنا خرجت بعد 9 شهور.بس ما كمنتش عارف تطورات القضية…سمة بنتى كلمتنى والت لي علي تقرير عصام..قلت أقدم شهادتى عشان عصام وغير عصام…أنا شايف إرهاب في السجن لو واحد رد الشتيمة مثلا..يفلكوه ويعلقوه ويفرجوا عليه المساجين..في هتك عرض للمساجين جوه..مصلحة السجون لما تيجي تدب في الناس..كل اللي راحو عسكرية شالوا قواضى..ولاد الناس شيلوا قضية سلاح وفي الآخر يطلعوا براءة..

ومثال آخر علي وضع السجون..أنا طلعت براءة في الآخر ومفروض ورقي يخلص علي طول وأطلع..ده ما بيحصلش..لازم تدفع وإلا تستنى بقي..كنت كل شوية أكلم بنتى تحول رصيد علي موبايل واحد..أقل حاجة 50 جنية..خلصت رصيد المحل عشان أخلص أوراقي وأطلع.

السجن في ظباط كويسيين زى محمد عاطف ومحمد صبحي وفيه ضباط مش طويسيين ..يقعدوك الأرض وممكن يدب رجله في وشك وأنت قاعد أو يعذبوا المساجين زى الظابط نور.