محمد: كسر في الجمجمة

يوم 23 يوليو اتحركنا من ميدان التحرير الساعة 1، وصلنا عند مسجد النور لقينا الجيش مقفل الطريق خالص، أسلاك شائكة ومدرعات. فوجئنا ان فيه ناس يتطلع من الشوارع الجانبية تضربنا بالعصي وطلع علينا واحد بسكينة كبيرة ومعاه ناس كتير بتضرب.

حدفوا علينا طوب ومولوتوف وزجاج وناس فوق البيوت بتحدف طوب. بعد شويه أصحاب العمارة طلعوا فوق السطوح واعتذروا والضرب وقف من فوق.

فجأة حسيت بخبطة في دماغي وبقيت مش قادر أتحرك. شالوني ودوني المستشفى الميداني اللي كانت معانا. الدكتور قال دي اصابة خطيرة ولازم أروح المستشفى. أصحابي شالوني وودوني استقبال الدمرداش وحطوني على تروللي. عملت اشعة عادية وبعدين أشعة مقطعية. كان فيه تباطؤ شديد وأنا بأنزف. بعد 3 ساعات عملوا لي اشعة مقطعية واكتشفوا ان فيه كسر في الجمجمة ودخلوني أوضة العمليات يوم السبت وخرجت على الرعاية. طبعا مفيش أي رعاية

يوم الأحد جم عساكر وأخدوا أقوالي. سألتهم انتم مين قالوا لي مأمور قسم الوايلي بعتنا وبصموني.

يوم الاتنين دخل اتنين وكلاء نيابة وكاتب وضابط أخدوا أقوالي بالتفصيل. مضيت وبصمت

مشيت من المستشفى 5 صباحا ورحت البلد عند أهلى