عبد الكريم: متبهدلناش زي العربيات اللي بعدنا، لأن اللي بعدنا اتكهربوا

كنت رايح أفطر عند واحد صاحبي في حدايق المعادي، نزلني الاتوبيس في التحرير عشان أركب المترو، جيت أركب المترو قفشتني الشرطة العسكرية، عسكري أمن مركزي مسكني وسلمني لعسكري شرطة عسكرية وسلمني لمجموعة عساكر ضربوني. سحبوا مني النضارة وكسروها برجليهم ودخلوني في المدرعة وكان فيها ناس بتنزف وريحة المدرعة وحشة جدا من الزحمة والدم.

جمعوا بطايقنا وأخدها شخص لابس مدني وفضل يسجل أسامينا في كشف، اتحركت المدرعة خطوات ووقفت عند عمر مكرم حوالي نص ساعة استنت باقي المدرعات واتحركوا مرة واحدة لقصر عابدين، قبل المغرب بساعة نزلونا ودخلونا ساحة واسعة قعدونا طوابير على الأرض مقرفصين، شتيمة وتهزيق، أكلونا باقي الأكل اللي فاض من العساكر بعد ما فات ساعة على الآدان، بعد الفطار جم ناس لابسين مدني (غالبا شرطة) فضلوا يشتمونا ويضربونا وأحنا واقفين طوابير..

ركبونا عربية ترحيلات زحمة جدا، اتخنقنا، طلعوا بينا للهليكستب يومين، أول ما نزلنا قابلونا عساكر وصف ظباط شتايم وضرب كنا أول عربية متبهدلناش زي العربيات اللي بعدنا، لأن اللي بعدنا اتكهربوا، قلعونا هدومنا وفتشونا ودخلونا على الزنزانة، وزعونا على 3 زنازين، محدش سأل فينا لا أكل ولا شرب.

رحنا الكشف الطبي ورجعنا الزنازين، اتسحرنا فول وجبنة كان طعمهم وحش جدا، والمية قليلة جدا، صحينا تاني يوم مش طايقين نفسنا وكان معانا بياعين كل شوية يعملوا مشاكل، فطرونا المغرب أكل قليل جدا (مكرونة وفرخة) تتوزع على عشرة، أكل مايتاكلش، أكل قليل جدا وكان بيفيض من كتر ما هو وحش، وطلع مفيش كانتين ولا حاجة.

أي حد يعمل مشكلة صغيرة الضابط يمسكه يضربه، أي حد يتكلم مع الزنزانة التانية ياخد علقة، صحونا الصبح وقالولنا هتمشوا الداخلية هتستلمنا من هناك في عربية ترحيلات، عاملونا معاملة كويسة، ونقلونا لمحكمة عابدين، قعدنا في المحكمة لحد المغرب، وبعد المغرب نقلونا على القسم (الموسكي – عابدين – قصر النيل – السيدة زينب) أنا نقلوني قصر النيل وعملولي فيش وأخدت افراج.