أيمن مهنى يحيى عفيفي: كان عاملني سلم يدوس عليّ وهو طالع وهو نازل

حي الرمل – الإسكندرية

أنا نازل من البيت رايح المظاهرة في سموحة أمام المديرية بعد أحداث "حمادة صابر"، يوم الأحد 3/2 الساعة 7 مساءاً. وصلت هناك ووقفت عند موبينيل قدام المركز الطبي بسموحة، قلت بالمرة أدفع فاتورة في موبينيل، ملحقتش. اترمت قنابل مسيلة للدموع، وبعد كده العربية المدرعة بتجري والناس بتجري قدامها.

شفت ناس لابسة ملكي ماسكين عصيان وبيضربوا الناس بيها، واحد منهم ضربني بالعصاية فوق حواجبي. وقعت وفقدت الوعي، شالوني وحطوني في المدرعة، فضلت مرمي في المدرعة طول وقت المظاهرة، والعسكري اللي بيضرب على المظاهرة قنابل كان عاملني سلم يدوس عليّ وهو طالع يضرب، ويدوس وهو نازل.. لحد ما المظاهرة خلصت، كتفوا إيدي وراء ضهري بالأفيز البلاستيك وحطوا كيس أسود في دماغي.

بعد كده نقلوني لمعسكر أمن مركزي، دخلنا جوا وأثناء الضرب والشتائم المستمرة، بيشتمونا ويقولولنا "يا كفرة" ويرموا مياه على أرضية الأوضة ويكهربوا المياه بسلك كهرباء. نفضل نتنطط من الكهرباء.

وبعد كده الضباط يتلموا علينا بالليل، يتسلوا علينا يقولولنا "انتوا السبب إننا مش عارفين ناخد أجازاتنا". ويربطونا بحبل في رقبتنا ويقعدونا على الأرض ويقولولنا "هوهو.. اعملوا كلاب". ويقولوا لكل واحد يختار إسم ست نناديك به. وينادونا بأسماء ستات.

ويصورونا بالموبايلات ويفرجوا بعض على اللي بيحصل ويتمسخروا علينا. أهانونا ودمرونا، وكرامتنا راحت.

وبعد 4 أيام، رمونا في الشارع في حتة زي الوكر، الناس تخاف تعدي فيها بالنهار.. إسمها "ضهر حديقة الحيوان" على ترعة المحمودية.

جرينا بشكل هستيري عشان نبعد عن العربية. أنا ماكنتش قادر أجري، فضلت أزحف على الأرض لحد ما بعدنا وروحنا بيوتنا. 

لمشاهدة شهادة أيمن مهنى بالفيديو، اضغط هنا