محمد مصطفى الصاوي.. إهانة وتقطيع هدوم وضرب بضهر الطبنجة
[[{“fid”:”158″,”view_mode”:”embed”,”fields”:{“format”:”embed”,”field_file_image_alt_text[und][0][value]”:””,”field_image_description[und][0][value]”:”محمد مصطفى الصاوى”,”field_file_image_title_text[und][0][value]”:””},”type”:”media”,”attributes”:{“alt”:”محمد مصطفى الصاوى”,”height”:145,”width”:220,”class”:”media-element file-embed”},”link_text”:null}]]
السبت 12 مارس 2016
اسم الضحية: محمد مصطفى الصاوي – 36 سنة. مكان التعذيب: قسم إمبابة.
كان فيه مشاجرة بين الجيران يوم التلات 8 مارس 2016 بين محمد مصطفى ابن خالتى وجارنا اسمه كامل محمد سالم واخوه احمد, الخناقة كانت الضهر. المشاجرة كانت بالايد وكامل اتعور.
فضينا الخناقة لكن كامل وأحمد عملوا محضر ضد محمد مصطفى وبرضو محمد عمل محضر ضدهم، فى قسم امبابة فى نفس اليوم 18 مارس. باقى اخوات الطرفين تدخلوا عشان المحاضر تتقفل بالصلح فى نفس اليوم.
لما الطرفين عملوا المحاضر حجزوا التلاتة (محمد مصطفى وكامل واحمد) كنا واقفين برة وسمعنا ان فيه صوت عالى جوة والتلاتة بيتكلموا مع رئبس المباحث محمد راسخ والظابط ملازم اول ماجد غراب . خرجونا برة القسم خالص عرفنا بعد كدة انهم ضربوهم علقة موت وبالذات محمد مصطفى لانه رفض انه يتشتم ورد على الظابط الضرب كان شديد، اهانة وتقطيع هدوم وضربوه بضهر الطبنجة.
قعدنا برة القسم، فجأة لقينا الأمناء ساندين محمد مصطفى لانه مش قادر يمشي ولا دارى باللى حواليه وبينقلوه لعربية ملاكى سايقها الملازم اول ماجد غراب، ومحمد مضروب ومعاه أمناء.
وراحوا بيه على المستشفى المركزى فى امبابة جنب القسم، احنا حصّلناهم مشي، وصلنا المستشفى لكن الحرس هناك رفضوا يدخلونا. فضلنا مستنيين برا كنا متضايقين جدا وفضلنا ننادى على الملازم ونقوله مكنش يصح الضرب ده.
ماجد غراب قالنا لو رجالة ابقوا كلمونى لما ارجع القسم. الساعة 6 م لقينا نفس العربية ونفس الاشخاص بينقلوا محمد مصطفى تانى لقسم الشرطة تانى. لما رجع القسم: اتعمل لمحمد مصطفى محضر مقاومة سلطات وتعدى على موظف اثناء عمله. عبد الحفيظ المعاون عمل لنفسه تقرير طبى فى مستشفى الشرطة انه عنده ( خربوش فى وشه ) ونسبه لمحمد مصطفى. تانى يوم الصبح ( الاربع ) 9 مارس، اتعرضوا على النيابة والنيابة قررت عرضه على الطب الشرعى انهاردة السبت 12 مارس 2016
الشرطة هددت الطرف التانى ( كامل واحمد) انهم ميتنازلوش ولا يعملوا صلح. الهدف من كدة ان القضية تفضل شغالة عشان يلبسوا التعذيب اللى حصل لمحمد مصطفى يلبسوه لكامل واخوه وكأنهم ضربوه الضرب ده كله فى الخناقة قبل ما يوصل القسم. وكتبوا فى المحضر ان محمد مصطفى جالهم مضروب القسم.