استغاثة أخ

أخويا معاق، بيعرج برجله اليمين ورجله الشمال مركب فيها شريحة ومسامير وايده اليمين مبتورة

كنت نايم جنبه في يوم في أول أسبوع في فبراير.. فجأة الجرس رن متواصل مع تخبيط جامد في نفس الوقت.. فتحت.. لقيت 11 ضابط ومخبرين.. قالوا لي عاوزين سمير (ليس اسمه الحقيقي) نسأله سؤالين ونرجعه.. وخدوه من على السرير

اتهموه انه حرق عربية شرطة وهرب هو وزمايله.. بعدها قبضوا على واحد صاحبه

أول ما أخدوه بعد الفجر ضربوه وعذبوه وحذروه انه ما يشتكيش ولا يحكي لحد إنه انضرب.. بقوا يمسكوا دماغه ويخبطوها في الحيط.. غموه وضربوه وشتموه.. عرفت ده من اللي كانوا معاه وخرجوا.. لكن ما كانش فيه فرصة أسمع منه

رحت الزيارة يوم الجمعة.. في الأول قالوا لي مفيش وبعدين بعد المحايلة خلوني أشوف أقل من خمس دقايق .. ما عرفتش أتكلم معاه.